ភ្នំពេញ៖ លោក ហ៊ុន ម៉ាណែត ស្ថិតនៅក្នុងចំណោមប្រជាពលរដ្ឋជាង៨លាន២នាក់ដែលបានទៅបោះឆ្នោតជ្រើសតាំងតំណាងរាស្ត្រនីតិកាលទី៧នាថ្ងៃអាទិត្យ ទី២៣ ខែកក្កដា ឆ្នាំ២០២៣ បានអរគុណដល់ប្រជាពលរដ្ឋជាច្រើនកុះករដែលចូលរួមទៅបោះឆ្នោត និងគាំទ្រដល់គណបក្សប្រជាជនកម្ពុជាឈ្នះភ្លូកទឹកភ្លូកដី។ លោកបានអះអាងថា ប្រការនេះហើយបានបង្ហាញនូវឆន្ទៈរបស់ខ្លួនយ៉ាងពិតប្រាកដ។
លោកបានសរសេរនៅក្នុងគណនីហ្វេសប៊ុករបស់លោកដូច្នេះថា៖«អរគុណចំពោះលោកតាលោកយាយ លោកអ៊ំពូមីងបងប្អូនទាំងអស់ដែលបានអញ្ជើញទៅបោះឆ្នោតជូនគណបក្សដែលខ្លួនស្រឡាញ់ និងជាពិសេសចំពោះការស្រឡាញ់និងការទុកចិត្តចំពោះគណបក្សប្រជាជនកម្ពុជា»។
លោក ហ៊ុន ម៉ាណែត បានថ្លែងថា គណបក្សប្រជាជនកម្ពុជានឹងប្តេជ្ញាបន្តចូលរួមបម្រើប្រទេសជាតិ និងប្រជាជនឱ្យបានល្អប្រសើរទៅថ្ងៃអនាគត។
លោក ហ៊ុន ម៉ាណែត ដែលជាបេក្ខជននាយករដ្ឋមន្ត្រីនៅថ្ងៃអនាគត ទទួលបានការចាប់អារម្មណ៍ពីសំណាក់ពលរដ្ឋដែលភាគច្រើនគាំទ្រលោកជានាយករដ្ឋមន្ត្រី ខណៈសម្តេចតេជោ ហ៊ុន សែន បានមានប្រសាសន៍ក្នុងបទសម្ភាសជាមួយទូរទស្សន៍ចិនថា សម្តេចគាំទ្រឱ្យលោក ហ៊ុន ម៉ាណែត ជានាយករដ្ឋមន្ត្រីនៅថ្ងៃអនាគតពីព្រោះសម្តេចជឿជាក់ថា លោក ហ៊ុន ម៉ាណែតមានសមត្ថភាពខ្ពស់ដែលអាចបន្តដឹកនាំប្រទេសកម្ពុជាឱ្យមានការរីកចម្រើនបន្ថែមទៀត៕
